Polîsan dekewtişê Xarpêtî de dest na hetkarîyanê ke qezaya Bodrumî ya Xarpêtî ra nameyê îdarekarê HDPyî ser o ameyî erşawitene. Xarpêt de talîmatê ”Hetkarîyî do hetê AFADî ra bêrê vilakerdene” têna vera HDPyî yeno xebitnayene
Erdlerzê Xarpêtî ra dima mexdurîyetê şarî hema zî dewam keno. Wezaretê Karanê Zereyî pare kerdbi ke hetkarîyî têna hetê AFADî ra do bêrê erşawitene û hetkarîyê ke hetê Şaredarîya Erxenî ya HDPyî ameybî açarnayene.
Partîyê sey AKP, MHP, CHP û dezgeh, tarîqat û rêxistinî hetkarîyan bi xo vila kenê. La destûr nêno dayene ke HDP bi destê xo hetkarîyan vila bikero.
Polîsî hetkarîyanê Heyetê HDPyî asteng kenê. Bi seyan betanîyayê ke hetê şarê Amedî ra ameybî erşawitene dekewtişê şaristanî ameybî açarnayene û hetkarîyê rêxistinanê HDPyî zî nênê girewtene bi Xarpêtî. Tewr peyêne zî polîsan dekewtişê Xarpêtî de semedo ke nameyê îdarekarê HDPyî ser o ameyî erşawitene dest na hetkarîyanê domanan û cinîyan ê ke hetê şarê qezaya Bodrumî ya Mugla ra ameybî arêdayene ser.
Hemserekê HDPyî yê Xarpêtî Bakî Yildirim derheqê serebûtî de qisey kerd û îfade kerd ke mexdurîyetê şarî hesabanê sîyasetî ra hîna girîng ê. Yildirimî da zanayene ke zaf kesî yenê HDP û hetkarîye wazenê û çend bêrê astengkerdene zî ê do xebatê xo dewam bikerê.
Yildirim eşkera kerd ke kesê ke eşkenê wa rast a rast bêrê Xarpêt û hetkarîyanê xo bi destê xo vila bikerê. XARPÊT
