HDP’ê li şûna hevşaredarên Peyas û Yenîşehîrê yên ku mazbata ji wan re nehate dayin, hevşaredarên nû diyar kirin
Di hilbijartinên xwecihî yên 31’ê adarê de Partiya Demokratîk a Gelan (HDP) ji bo hevşaredariya navçeya Yenîşehîr a Amedê Îbrahîm Çîçek û ji bo hevşaredariya navçeya Peyasê jî Necatî Pîrînççîoglû weke namzet nîşan dabû. Her du namzet jî hatibûn hilbijartin. Lê belê Lijneya Hilbijartinê ya Bilind (YSK) bi hinceta ku her du hevşaredar beriya niha bi biryarnameya di hukmê qanûnê de ji kar hatine dûrxistin, mazbata nedan wan.
Desteya Navendî ya Rêveberiyên Xwecihî ya HDP’ê ji bo destnîşankirina hevşaredarên nû bi HDP’ê ya Amedê re kete nava hewldanan. Bi vê armancê jî bi koma meclisê ya her du şaredariyan re civînek hate lidarxistin.
Di encama civînê de Mehmet Devîren ji bo hevşaredariya Yenîşehîrê û Davût Keser jî ji bo hevşaredariya Peyasê hatin destnîşankirin. Her Devîren û Keser di meclisên şaredariyan de bûn. AMED
