HRE’yê da zanîn ku hêzên wan li Efrînê rêzeçalakî pêk anîn û di encama van çalakiyan de 10 leşker û çete hatin kuştin
Hêzên Rizgariya Efrînê (HRE) têkildarî çalakiyên wan ên di 18’ê cotmehê de yên li Şera û Şêrawa yên kantona Efrînê daxuyanî da.
HRE’yê da zanîn ku hêzên wan di çarçoveya rêzeçalakiyên tolhildanê de duh li navçeyên Şêrawa û Şera yên girêdayî Efrînê çalakî li dar xistin. HRE’yê daxuyand ku di roja18’ê cotmehê de li gundên Meryemîn, Enabkê û Malikiyê yên Şerayê hêzên wan li dijî 2 baragehên artêşa tirk a dagirker çalakiyên sabotajê pêk anîn. HRE’yê daxuyand ku di çalakiyan de leşkerek hate kuştin, 3 leşker birîndar bûn û 2 seyareyên leşkerî jî hatin derbkirin.
Bi berdewamî jî HRE’yê ev agahî dan: “Di heman rojê de li gundê Basûtê û Cebel Ehlam ê Şêrawayê hêzên me ji du baskan ve li dijî 2 bendên kontrolê yên çeteyên dewleta tirk çalakî pêk anîn. Di çalakiyê de 9 çete hatin kuştin, hejmarek jê birîndar bûn û 3 seyareyên leşkerî jî hatin derbkirin. Piştî çalakiyan, hêzên dagirker gundên Şewarxa û Malikiyê yên Şerayê û gundên Soxanek, Bênê û Aqîbê bi dijwarî topbaran kirin û balafirên keşfê jî li ser van herêman digeriyan.”
