Serokatiya Fermandariya Giştî ya Îranê bi daxuyaniyekê ragihand ku balafira ku ji paytexta Îranê Tehranê ber bi paytexta Ukraynayê Kîevê ve diçû, ji hêla hêzên wan ve bi şaştî hatiye xistin
Di 8’ê çileyê de balafira Boeing 737 a girêdayî Qada Hewayî ya Ukraynayê dema ku ji Balafirgeha Xumeynî ber bi paytexta Ukraynayê Kîevê ve diçû, 40 kîlometreyan nêzî Tehranê kete xwarê. Hat ragihandin ku balafir piştî rabûnê 10 deqe şûnde ketiye. Di balafirê de 176 kesan jiyana xwe ji dest dan.
Di serî de rayedarên Îranê gotin ku balafir ji hêla hêzên wan ve nehatiye xistin. Li dîmenên lêxistina balafirê li ser medyaya civakî hatibûn parvekirin. Têkildarî mijarê Serokatiya Fermandariya Giştî ya Îranê careke din daxuyaniyek da û îtîraf kir ku balafira rêwiyan a Ukraynayê ji hêla hêzên wan ve bi şaştî hatiye xistin. Wezîrê Karên Derve yê Îranê jî anî ziman ku balafir bi şaştî hatiye hedef girtin û lêborîna xwe ji malbatên qurbaniyan xwest.
Wezîrê Karê Derve yê Îranê Cewaz Zerîfî jî lêborînê ji gelê Îranê xwest û wiha got: “Me bi xeletî li balafirê xist û em poşmanin. Em daxwaza lêborîn û sersaxiyê ji gelê xwe û malbatên qurbaniyên neteweyên din re dixwazin. DYA bû sedema vê yekê.”
