Baroya Amedê ji bo ewlehiya hilbijartinê û çareserkirina pirsgirêkên di dema hilbijartinê de rû didin, navenda krîzê ava kir. Serokê Baroya Amedê Cîhan Aydin da zanîn ku navenda krîzê ji 30 parêzeran pêk tê û dê ev parêzer li qadê bi aktîf bixebitin
Ji bo ewlehiya hilbijartinê û pêşîlêgirtina qewimînên neyînî, Baroya Amedê navenda krîzê ava kir. Hat zanîn ku dê sindoq ji hêla 30 parêzeran ve bên şopandin û ji bo çareserkirina pirsgirêkan derdikevin jî dê navenda krîzê agahdar bikin. Piştî vê, ji bo çareserkirina pirsgirêkan dê navenda krîzê jî pêwendiyê bi desteyên hilbijartinê yên bajêr û navçeyan re deyne.
Der barê mijarê de serokê Baroya Amedê Cîhan Aydin axivî û diyar kir ku Baroya Amedê ji berê ve hewl dide hilbijartin di nêvengeke demokratîk de pêk bên û wiha domand: “Îsal jî em ji bo vê yekê li hev civiyan. Dê hevalên me yên peywirdar li navenda Amedê li dibistanan bigerin û ji bo çareserkirina pirsgirêkan tev bigerin. Me jî li navenda baroyê, navenda krîzê ava kir. Em ê bi desteyên hilbijartinê re her tim di nava pêwendiyan de bin û hewl bidin pirsgirêkan çareser bikin.”
Aydin diyar kir ku ew dixwazin hilbijartin bê pirsgirêk derbas bibe û wiha dawî li axaftina xwe anî: “Maseya krîzê dê ji 30 parêzerên Baroya Amedê pêk bê. Hevalên me dê li qadê bin û biçin dibistanan. Dê hevalên me yên li qadê pirsgirêkan ragihînin maseya krîzê û em jî pêwendiyê bi desteyên hilbijartinê yên bajêr û navçeyan re deynin.” AMED
