Ji bo pîrozkirina 1’ê Gulanê Cejna Karker û Kedkarên Cîhanê, Komîteya Amadekar a 1’ê Gulanê ya Amedê bang li gelê Amedê kir. Komîteyê her kesên edalet, aştî, demokrasî, ked û azadiyê dixwazin vexwandin qada mîtîngê ya Îstasyonê
Komîteya Amadekar a 1’ê Gulanê ku ji saziyên Konfedarasyona Sendîkaya Karkerên Şoreşger (DÎSK), Konfedarasyona Sendîkaya Kedkarên Cemaweriyê (KESK), Odeya Bijîşkan a Amedê û odeyên girêdayî Yekitiya Odeyên Avahîsaz û Endezyarên Tirkiyeyê (TMMOB) pêk tê, ji bo mitînga 1’ê Gulanê Cejna Karker û Kedkarên Cîhanê serî li Walîtiya Amedê da. Piştî serlêdanê, Komîteya Amadekar a 1’ê Gulanê li Şaxa Jimar 2’yan a Genel-Îş’ê ya girêdayî DÎSK’ê civîna çapemeniyê li dar xist.
Di civîna çapemeniyê de serokê Komîteya Amadekar a 1’ê Gulanê Hasan Hayrî Eroglu axivî û da zanîn ku wan dest bi amadekariyên pîrozbahiya 1’ê Gulanê kirine. Eroglu diyar kir ku dê li dijî geşedanên li welat diqewimin bêdeng û bêbertek nemînin. Eroglu got ku mîna li her devera Tirkiyeyê, dê li Amedê jî 1’ê Gulanê pîroz bikin û wiha domand: “Mixabin di salên dawî de li welatê me li dijî kedkar, alîgirên kedê û demokrasiyê ne êrîşên bi zext, qedexe, girtin û tecrîdê didomin.”
Ji bo daxwaza mafên xwe dê herikin qadê
Eroglu destnîşan kir ku 1’ê Gulanê di heman demê de dîroka têkoşîna civakî, wekhevî û azadiyê ye û wiha pê de çû: “Ji bo em li dijî hemû neheqiyên li dijî karker û kedkaran dengê xwe derbixin, em ê di mitînga 1’ê Gulanê de bên gel hev. Ji bo em li mafê kesên hatin îxrackirin bigerin, em ê werin gel hev. Em ê li dijî kesên otorîter û bi zextan nêzî çareseriya pirsgirêka kurd dibin, em ê ji bo azadiyê, demokrasiyê, aramiyê û ji bo cîhaneke bêşer û bê mêtandin, ji bo parastina rûmeta mirovahiyê bên gel hev.”
Her kes vexwend mîtîngê
Eroglu wiha dawî li axaftina xwe anî: “Em her kesê ku dixwaze daxwazên xwe yên edalet, aştî, demokrasî, ked û azadiyê bînin ziman vedixwînin qada mîtîngê ya 1’ê Gulanê. Em ê li dijî binpêkirina mafên sendîkayî, hewldanên li dijî azadiya îfade û ramanê, polîtîkayên şer û zext, dê bi daxwaza ked, aştî, azadî û demokrasiyê li Qada Îstasyonê bin.” AMED
