Jinên kurdistanî li bajarên Santîago û Vîgo yên herêma Galicia ya Spanyayê bi semînrek sê jinên kurd Sakîne Cansiz, Fîdan Dogan û Leyla Şaylemez bi bîr anîn. Jinan di semînerê de piştgirî da çalakiya Leyla Guven ku ev 65 roj in di greva birçîbûnê de ye
Li bajarên Santîago û Vîgo yên herêma Galicia ya Spanyayê, sê jinên kurd ên şoreşger Sakîne Cansiz, Fîdan Dogan û Leyla Şaylemez ku di 9’ê Çileya 2013’an de li Parîsa Fransayê hatibûn qetilkirin, hatin bibîranîn. Ji bo bîranînê Platforma Baran a herêma Galicia û Rêxistina Meşa Jinan a Cîhanê semîner organîze kir. Semîner ji aliyê endama Komîteya Jineolojiyê ya Ewropayê Necîbe Qeredaxî ve hat dayîn.
Di beşa yekemîn a semînerê de qala komkujiya Parîsê, têkoşîna Sakîne Cansiz û bandora wê ya li nav têkoşînê hate kirin. Piştre jî sînevîzyonek li ser jiyan û têkoşîna Sakîne Cansiz hate nîşandan.
Di beşa duyemîn de jî dîroka têkoşîna azadiyê ya gelê Kurdistanê û asta ku şoreşa jinê gihîştiyê, hatin nirxandin û qala jineolojiyê hate kirin.
Di heman semîneran de armanca grevên birçîbûnêv ên li zindanên Kurdistan û Tirkiyê, li Hewlêrê, Strasboûrg û Îngilistanê agahî hatin dayîn û girîngiya Rêberê Gelê Kurd Abdullah Ocalan ji bo têkoşîna gelan a li dijî sîstemê û ji bo jiyana azad, hate vegotin.
Di dawiya semînerê de jinan peyamek belav kirin û piştgirî da çalakiya hevseroka KCD’ê Leyla Guven ku 65 roj in li dijî tecrîdê di greva birçîbûnê ya bêdem û bêdorveger de ye.
Jinan di peyamê de diyar kir ku daxwaza Leyla Guven daxwaza wan e û wiha gotin: “Ocalan ne tenê rêberê kurdan e, ew rêber û çavkaniya azadiyê ye.” VÎGO
