Jineolojî û gundê Jinwar li Liege bi semînerekî ji jinên belçîkî re hatin vegotin. Di semînerê de hat diyarkirin ku jinên Rojava bi têkoşîn û berxwedana xwe ji jinên cîhanê re bûne mînak
Li bajarê Liege yê Belçîkayê bi daxwaza saziya ‘Têkoşîna li dijî tundiya malbatî’ Komîteya Jineolojiyê ya Ewropayê semînerek ji komek ji jinên belçîkî re pêk anî. Tevî jinên belçîkî gelek jinên koçber û ji çandên cuda jî tev li semînerê bûn.
Di semînerê de gundê Jinwar ê li rojavayê Kurdistanê û mijara jineolojiyê hatin nirxandin.
Endama komîteya jineolojiyê yê Ewropayê Necîba Qeredaxî û endama navenda jineolojiyê yê Brukselê Aysel Ariş di semînerê de axivîn.
Di destpêka semînerê de derbarê Kurdistanê de bi taybetî rojavayê Kurdistanê ji taybetmendiyên xwe yên cografî, çandî, siyasî, civakî û dîrokî agahiyên berfireh hatin pêşkêşkirin.
Piştre jî şoreşa Rojava û pêşengiya jinan di vê şoreşê û guhertina ku armanc kiriye hatin vegotin.
Derbarê gundê Jinwar de jî hate gotin ku ne tenê cihê niştecihbûnê ye, di heman demê de qada ji nû ve avakirinê û zemînê guhertina kesayetî û pêşvebirina kesayet e.
Jinên belçîkî jî diyar kirin ku jinên li Rojava bi têkoşîna xwe ya li dijî tundiya malbatî û bi gundê Jinwar bûne mînak ji jinên cîhanê re. LIEGE
