Wan de çalakîyê vera tayînkerdişê qeyûman de polîsan îşkence bi nêweşêko şîzofren yê bi nameyê Firat Koçî kerdbî. Kamîyê 3 polîsê îşkencekarî ame eşkerakerdene. Ame zanayene ke Walîtîya Wanî derheqê 3 polîsan de tehqîqatê îdarî daya destpêkerdene
21ê tebaxe de şar vera tayînkerdişê qeyûman de çalakîyan viraştbî. Polîsan zî mudaxaleyê çalakgeran kerdbî. Polîsan wextê mudaxalekerdişan de eştbî qehwexaneyêk ser û bi kask, cop û payan hêrişê nêweşêko şîzofren yê bi nameyê Firat Koçî kerdbî. Polîsan verê çimanê her kesî de îşkence bi Koçî kerdbî. Koçî badê hedîse polîsan gere kerd û gerrekerdişê Koçî ra nata 4 aşmî derbaz bî. Baroya Wan û avûkatî derheqê îşkence de muracatê Serdozgerîya Wanî dabî. Dozgerîya Wanî rê nuşte erşawitbî û waştbî ke polîsî bêrî tespîtkerdene.
Walîtî badê 4 aşman cewab da nuşteyê dozgerî. Walîtî da zanayene ke kamîyê 3 polîsanê ke tewrê hedîse bîyî ameyo zelalkerdene û derheqê înan de tehqîqat dîyayo destpêkerdene. Tehqîqatê îdarî demêk verê ameyo akerdene. Nîno zanayene ke badê ke tehqîqat temam bibo do derheqê polîsan de doze bêra akerdene ya nê. WAN
