Serhildana Rojhilat ku bi pêşengiya jinan berdewam dike hin encaman bi xwe re tîne; li gor Serdozgerê Giştî yê Îranê, karê ‘Polîsên Exlaqê’ ên Îranê hatiye rawestandin.
Serhildanên ku di meha îlonê de li Rojhilatê Kurdistanê û Îranê ji ber kuştina jina kurd a ciwan Jîna Emînî dest pêkiribûn, berdewam dikin. Serhildan êdî bi xwe re destkeftiyan tînin. Li gorî nûçeyeke ku Ajansa nûçeyan a fermî ya Îranê (ÎRNA) der bas kir, karê ‘Polîsên Exlaqê’ ên Îranê hat rawestandin.
ÎRNA’yê di nûçeya xwe de ragihand ku Serdozgerê Giştî yê Îranê Mihemed Cehfer Muntezrî di merasîmekê de bersiv da pirsa ‘Ji bo çi karên ‘Polîsên Exlaqê’ hat rawestandin’ û ev tişt got; “Tu peywendiya Polîsên Exlaq bi dadweriyê ve nîne, li heman cihê hatî damezrandin, biryara rawestandinê jî hatiye derxistin.”
Her wiha Serdozger Mihemed Cehfer Muntezrî di civîneke 1’ê kanunê de der barê serhildanan de ev tişt gotibû: “Parlamento û Desteya Bilind a Şoreşa Îslamî, pirsa hîcabê guftugo dikin. Tê payîn ku heta 15 rojên din encamên vê mijarê wê derbikevin.”
