Komîteya Têkiliyên Derve ya KCK’ê bi daxuyaniyeke nivîskî Demhat Agît (Seyîtxan Ayaz) û endamê Komîteya Tenduristiyê Cemîl Amed (Eser Irmak) k udi 15’ê Cotmeha 2019’an de di encama êrîşa balafirên şer ên dewleta tirk a dagirker ve hatin qetilkirin, bi bîr anî.
Daxuyaniya Komîteya Têkiliyên Derve ya KCK’ê wiha ye: “Endamê Komîteya Têkiliyên Derve ya KCK’ê Demhat Agît û xebatkarê Tenduristiyê Cemîl Amed ku bi rengekî fermî li başûrê Kurdistanê wezîfedar bûn, di 15’ê Cotmeha 2019’an de li Silêmaniyeyê bi balafirên şer ên bêmirov ên dewleta tirk a faşîst ve hatin qetilkirin. Bi vê wesîleyê, em hevalên xwe yên hêja yên kar, hevalên xwe yên leheng, hevrêyên fedakar û bi rûmet ên gelê xwe û pêşengên şoreşger ên tevgera xwe di salvegera yekemîn a şehadeta wan de bi rêzdarî û minetdarî bi bîr tînin. Em biryardariya xwe careke din nîşan didin ku ji bo bîranîna wan em ê têkoşîna ji bo Kurdistana Azad û Rojhilata Navîn a demokratîk bi ser bixin.
Artêşa tirk a faşîst di 9’ê Cotmeha 2019’an de tevî komên xwe yên çete yên tecawizkar bi taybetî tevî çeteyên DAIŞ û El Nûsrayê êrîş bir ser bajarên Serêkaniyê û Girê Spî yên rojavayê Kurdistanê. Ev êrîşa dagirkeriyê bi destûr û dilê DYE’yê hate kirin. Hêzên emperyalîst û netewe dewletên li herêmê êrîşên dagirkerî û qirkirinê yên dewleta tirk bi kar anîn û ji bo destketî û şoreşa li rojavayê Kurdistanê tasfiye bikin, xwestin veguherînin firsendê. Dewleta tirk a faşîst hîn dest ji vê polîtîkaya xwe bernedaye. Êrîşên ji bo tunekirina destketiyên kurdan û qirkirina kurdan, li her devera Kurdistanê bi alîkariya nokeran bênavber dewam dike.
Di demekê de ku êrîşên dagirkeriyê li ser Serêkaniyê û Girê Spî hebûn, du hevrêyên me yên bi ruhê welatparêzî û azadiyê yê kûr xwedî rabirdûyeke dûr û dirêj a şoreşgerî û kedeke mezin bûn, bi piştgiriya feraseta xayîn û nokeran hatin qetilkirin. Tevî vê yekê jî rêveberî û hikûmeta başûrê Kurdistanê hîn bersiv nedaye ku komkujiya hevalên Demhat û Cemîl ji aliyê kê ve bi piştgiriya kê hatiye kirin. Em careke din radigihînin ku malbatên van hevrêyên me, gelê me û tevgera me ji bo ronîkirina komkujiya hevrêyên me Demhat û Cemîl li benda daxuyaniyeke têrker in.
Hin hêz di vê serdemê de jî civaka me ya êzidî ya ku li dijî qirkirin û polîtîkayên komkujiyê yên DAIŞ’ê li ber xwe da û hebûna xwe diparêze, ji derfetên xwerêveberî û xweparastinê bêpar dihêlin. Ev hêzên navborî derdorên noker ji nû ve xistine dewrê. Ji bo tunekirina destketiyên civaka me ya êzidî, PDK û hikûmeta Iraqê hevkarî kirine û li hev kirine. Vê polîtîkaya xwe jî bi navê hikûmeta başûrê Kurdistanê dimeşîne û dixwaze rewa bike.
Yên ku bûn bingeh ji şehadeta hevrêyên me re, ji operasyonên dagirkeriyê re û ji qetilkirina civaka me ya êzidî re, yên ku rê dan vê yekê, hevkarî û teşwîq kirin, divê ji aliyê gelê me ve bê dîtin û li dijî wan helwestek, seknek dijber bê nîşandan.” BEHDÎNAN
