Komên çete yên girêdayî dewleta tirk li ser rêya di navbera gundên Ebû Sira û Xalidiye yên Eyn Îsayê de rê li ber şêniyên herêmê girtin û dest danîn ser wesayît û malê wan
Dewleta tirk û çeteyên wê piştî ku gelek herêmên rojavayê Kurdistanê dagir kirin, li herêmê dest bi talan, dizî, revandin û wêraniyeke mezin kirin. Di çarçoveya van binpêkirinan de komên çete welatiyên herêmê direvînin, rê li welatiyan digirin û gelê herêmê dişêlînin.
Li gorî agahiyên ji herêmê, artêşa tirk û çeteyên wê li ser rêya di navbera gundên Ebû Sira û Xalidiye yên Eyn Îsayê rêya bazirganan ên mal ji Reqayê dibin Minbicê birîn û dest danîn ser mal û wesayîtên sivîlan. Hat ragihandin ku bûyer di şeva 9’ê çileyê saet di 18:00’an de rû da.
Têkildarî mijarê welatiyên bi navên Sebir Nezîr Edî Sûbe û Ehmed Mehmûd Nebîsî ku pismamê hev in û mal dibirin ji Minbicê re anîn ziman ku çeteyên dewleta tirk rêyan li welatiyan digirin. Sûbe da zanîn ku ew di navbera Reqa û Minbicê de bazirganiyê dike û serpêhatiya xwe wiha vegot: “Duh di demên êvarê saet derdora 18:00’an de dema diçûm Minbicê, şeş kesên çekdar rêya me birîn. Ez û pismamê xwe bi hev re bûn. Em bi du wesayîtan diçûn. Em ji wesayîtan peya kirin. Bi çekê li serê pismamê min xistin. Dest danîn ser wesayîtên û malên me.”
Bi çekê li serê wî xistin
Der barê mijarê de Nebîsî jî ev agahî parve kirin: “Ev kesên ku kincên leşkerî li wan bûn û bi çek bûn ji kêleka rê ji nişka ve derketin pêşiya me. Bi çekê li serê min xistin. Serê min şikest. Piştre nasnameyên me, ewraqên me, fatureyên me û wesayîtên me birin û çûn. Em bi wesayîteke sivîl hatin heta deverekê. Piştre jî endamên Asayîşa Eyn Îsayê em dîtin. Em birin nexweşxneyê.” EYN ÎSA
