HDP’ê ya Denîzliyê bi tevlêbûna hezaran welatiyên Denîzliyê agirê Newrozê geş kir. Parlamenterê HDP’ê yê Îzmîrê Murat Çepnî diyar kir ku Newroza îsal dê bibe zîrveya têkoşînê
Partiya Demokratîk a Gelan (HDP) a Denîzliyê bi dirûşma ‘Teqez em ê bi ser bikevin’ li Qada Pazarê ya taxa Muratdede bi tevlêbûna hezaran welatiyan Newroz pîroz kir. Di pîrozbahiya Newrozê de parlamenterê HDP’ê yê Îzmîrê Murat Çepnî, namzetên Hevşaredariya Denîzliyê, hevserokên HDP’ê yên Denîzliyê jî di nav de bi hezaran welatî amade bûn. Welatiyên bi cilên xwe yên herêmî û rengîn tev li pîrozbahiyê bûn, qada Newrozê xemilandin. Bi hezaran welatiyên li qada Newrozê kom bûn bê navber dirûşma ‘Leyla Guven rûmeta me ye’ berz kirin.
Di pîrozbahiyê de parlamenter Murat Çepnî axivî û xwest Newroz ji bo hemû gelê cîhanê aştî û azadiyê bîne. Çepnî da zanîn ku di bin banê HDP’ê de dê wekhevî û demokrasiya gelan pêş bikeve û wiha axivî: “Newroz dê bibe zîrveya vê têkoşînê. Koalîsyona AKP-MHP’ê demek dirêj e tenê şer pêş dixe. Tenê soza şer dide. Xwestin li dijî gelê kurd û Rojhilata Navîn şer geş bikin.”
Her wiha piştî axaftinan pîrozbahî bi stranên solîsta Agirê Jiyan Mervan Tan berdewam kir. DENÎZLÎ
