Hêzên artêşa tirk û çeteyên wê li Efrînê 5 sivîlên din revandin. Têkildarî aqûbeta welatiyên hatin revandin tu agahî nehatin bidestxistin
Binpêkirinên hêzên artêşa tirk û komên çete yên girêdayî wê yên li Efrînê bênavber didomin. Hêzên dagirker li Efrînê rojane welatiyan direvînin, îşkence dikin û dikujin. Bi taybet jî bûyera revandina sivîlan di demên dawî de hê zêdetir bûye.
Li gorî agahiyên ji çavkaniyên Şera ya Efrînê, komên çete yên El Emşatê duh ji gundê Senerê yê Şiyê yê Efrînê 4 welatî revandin. Navên kesên hatine revandin wiha ne: “Elûş Mihemed Cirko, Şîfar Mûstefa Sado, Zîbar Elî Elo û Henan Mihemed Ehmed.”
Çavkaniyeke din ê ji navçeya Mabata ya Efrînê jî ragihand ku komên çete yên girêdayî dewleta tirk duh li gundê Şêxotka yê Mabata yê Efrînê welatiyê bi navê Henan Mihemed Şêx Seydî revandî ye.
Têkildarî çarenûsa welatiyan heta niha tu agahî nehatine bidestxistin. EFRÎN
