HRE’yê bi daxuyaniyeke ragihand ku di encama rêzeçalakiyên hêzên wan de li Efrînê leşkereke artêşa tirk û 6 çeteyên wê hatin kuştin
Hêzên Rizgariya Efrînê (HRE) der barê rêzeçalakiyên hêzên wan ên di 3’yê çileyê de li herêma Efrînê li dijî hêzên artêşa tirk û çeteyên wê pêk anîn, daxuyaniyeke nivîskî weşand. HRE’yê da zanîn ku hêzên wan rêçalakiyên bibandor pêk anîne.
Di berdewamê de jî HRE’yê daxuyand ku hêzên wan li xeta gundê Kîmarê yê Şêrawa ya Efrînê li dijî 3 seyare û baregeheke çeteyên artêşa tirk a dagirker 2 çalakiyên sabotajê û 2 çalakiyên taybet pêk anîn. HRE’yê da zanîn ku di encama çalakiyan de leşkerek û 6 çeteyên koma Firqe Hemzet ên girêdayî dewleta tirk hatin kuştin. HRE’yê diyar kir ku di heman çalakiyan de 7 çete jî birîndar bûn û 3 seyare jî hatin îmhakirin.
HRE’yê destnîşan kir ku di heman demê de artêşa tirk û çeteyên wê gundên Soxanekê û Meyasê yên Şêrawayê bombebaran kirin û li ser herêmê jî balafirên keşfê geriyan.
