Tevgera Azadiya Jinên Êzidî (TAJÊ) ku 27’ê Tebaxa 2021’an de civîna xwe ya 6 mehan lidar xist, li gel nirxandinên kar û xebatan, biryarên girîng girtin.
Berdevka Tevgera Azadiya Jinên Êzidî (TAJÊ) Sebîha Sebrî der barê mijarê de agahî dan ajansa Rojnewsê û destnîşan kir ku ew di rewşek pir hesas re derbas dibin, lewma di civîna wan de mijarê siyasî, civakî, ewlekarî û planên dijî Şengalê tên meşandin, bi berfirehî hatine nirxandin.
Sebîha Sebrî da zanîn ku mijara ewlekariyê û vegera koçberan ji bo Şengalê rojevek girîng a civîna wan bû, di vê çarçoveyê de li ser rêbazên vegerandina koçberan, ewlekariya wan û alîkarîdayînê hatiye rawestîn.
Sebîha Sebrî diyar kir ku di encama nirxandinan de girîngiya parastin û pêşketina jinan zêdetir derketiye pêş, lewma wan biryar girtiye ku di nava 2 mehan de Asayîşa Jinan bê avakirin.
Her wiha Sebrî bal kişand ku bi armanca eleqedarbûna bi pirsgirêkên jinan û çareseriya wan re dê Mala Jinan jî were avakirin û da zanîn ku zarok jî mijarek girîng a Şengalê ye, ji ber vê yekê di civînê de biryar hatiye girtin ku li tevahiya Şengalê Baxçeyên Zarokan (Rewda) werin vekirin. ŞENGAL
