Şervanên HSD’ê li Serêkaniyê derbên giran li dagirkerên dixwestin bikevin bajar dan. Di pevçûnan de panzêreke dagirkeran hate rûxandin û gelek çete û leşkerên tirk hatin kuştin. Li Dêrikê jî dagirkeran di topbaranê de sivîlek qetil kir
Şer û pevçûnên di navbera şervanên Hêzên Sûriyeya Demokratîk (HSD) û hêzên dagirker ên dewleta tirk û çeteyên wê bi hemû dijwariya xwe berdewam dike. Şervanên HSD’ê li dijî komên dagirker ên ku dixwazin li eniyê şer ên Serêkaniyê, Dêrik, Girkê Legê, Dirbêsiyê, Tirbespiyê, Girê Spî û Kobanê bi pêş bikevin, ji şervanan derbên giran dixwin.
Di çarçoveya êrîşên dagirkeriyê de, hêzên dagirker êrîşî Serêkaniyê kir. Hat zanîn ku şervanên HSD’ê jî bersivên tund dan komên çete û li herêma pîşesaziyê ya li rojhilatê Serêkaniyê panzêreke leşkerî ya dagirkeran hate rûxandin. Di encama şer de 3 leşker û çeteyên dewleta tirk hatin kuştin û 3 jî birîndar bûn. Dagirkerên din jî ji herêmê reviyan. Her wiha li dora kevana bajarokê Til Helef a li başûrê rojavayê Serêkaniyê jî şerekî dijwar rû da. Hat zanîn ku di encama bersivdayîna şervanan de gelek çete û leşkerên dagirker hatin kuştin û birîndarkirin.
Sivîlek hate qetilkirin
Li gorî agahiyên ji Dêrikê, dewleta tirk û çeteyên wê gundewarên Dêrikê topbaran û bombebaran kirin. Hat zanîn ku di encama êrîşa hovane de welatiyeke sivîl şehîd bû û welatiyek jî birîndar bû.
