Li paytexta Sûdanê Hartûmê, hejmara mirovên ji ber êrîşa Konseya Leşkerî ya darbekar a li dijî çalakiya rûniştinê gihîşt 60 kesî
Komîteya Doktorên Sûdanî bîlançoya nû ya êrîşa leşkeran a li dijî çalakiya rûniştinê aşkera kir. Li gorî daxuyaniya komîteyê, ji duşemê ve herî kêm 60 kes mirine.
Bi fermana Konseya Leşkerî ya Demkî ku dest daniye ser desthilatdariyê, êrîş li dijî çalakiya rûniştinê hatibû kirin ku li pêşiya biryargeha leşkerî ya li Hartûmê hatibû pêkanîn.
Êrîş ji aliyê Neteweyên Yekbûyî, Dewletên Yekbûyî yên Amerîka, Brîtanya Mezin û gelek welatên mezin ve bi tundî hate şermezarkirin. Li Konseya Ewlekariyê ya Neteweyên Yekbûyî, belavoka ku kuştina sivîlên li Sûdanê şermezar dike, ji aliyê Rûsya û Çînê ve hate blokekirin. Di belavokê de dihate xwestin ku tundî tavilê bi dawî bibe û danûstandin pêk werin.
Komîteya Doktoran diyar kir, milîsên Konseya Leşkerî ji komkujiyê berpirsyar in. Li gorî tevgera gel, rêxistina milîs a bi navê Hêzên Desteka Lezgîn bi taybetî tevlî êrîşê bûne. HARTÛM
