Midûre Duyemîn ê Girtîgeha Tîpa L ya Patnosê gefa mirinê li girtiyan xwar. Malbatên girtiyan da zanîn ku midûrê duyemîn ev gef xwariye; ‘Ez dewlet im û hûn hemû dê li vir bimirin.’
Çalakiya greva birçîbûnê ya bêdem û bêdorveger ku girtiyên li girtîgehên bakurê Kurdistanê û Tirkiyeyê ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin, berdewam e. Bi destpêkirina çalakiyan re zextên li ser girtiyan jî zêde bûn. Gelek girtî rastî cezayên hucreyê tên, tên derbkirin, îşkencekirin û mafên wan tên binpêkirin. Li Girtîgeha Tîpa L ya Patnosê jî heman binpêkirin didomin.
Li gorî agahiyan, Midûrê Duyemîn ê Girtîgeha Tîpa L ya Panos a Agiriyê li girtiyên di çalakiya greva birçîbûnê de gefa ‘mirinê’ lê xwariye. Girtiyên di roja çarşemê de bi rêya xizmên xwe re hevdîtin kirin, destnîşan kir ku midûrê duyemîn ê girtîgehê her tim di nava qawîşan de digere û gefa; ‘Ez dewlet im û hûn ê li vir bimirin’ dixwe.
Xizmên girtiyan daxuyand ku bi qasî ku pêwîst ji girtiyan re av nayê dayîn û tenê vîtamîna B1 tê dayin. Malbatan da zanîn ku rewşa tenduristiyê ya du girtiyan pir nebaş e. AGIRÎ
