Her roco ke merdim binê rayveberîya na desthilatîya tekparêze de derbas keno çiyêke de mat maneno. Heme vatiş û îzahatê ecêbî ke bi çekûyanê sey ‘milî, xocayî, eyy filankes, eyy bêvankes, mîhraqê teber û zerreyî, yew Ziwan, yew Milet…, miletê MIN û nika zî bi çekûya Ma Eleqedar Nêkeno…’ bi rayîrê kanalanê Medya bê hemd konê çimanê ma ver û gunenê goşanê ma ro matmendişê ma zêdyeno.
Helbet çi heyf ke tenê matmendişê ma nêzêdyeno sey şarê Kurdî, Tirkî û şarê bînî ke binê na desthilatîye de cuwîyênê mexdûrbîyayîşê ma zî zêdyêno. Ma zanê ke her telafûzêke semedê ma şarî xetereyêke xo de hebêneno.
Ma heme çekûyê bînan bidê hetêke çekûya ‘no qerar ma eleqedar nêkeno’ ke hetê serokkomarê Tirkiye ra bi mexsedê qerarê Dadgeha Heqê Merdiman a Ewropa ke serbestveradayîşê hemserokê verî yê HDP’î Selaheddîn Demîrtaşî waşt ame xebetnayîşî tenê zî bi serreyê xo bêhiqûqî yo. Her kes zano ke goreyê qanûnî ra lazim o daraze azad bo û serokkomar zî tede ti kesêke qeraranê xo yê şexsî bi ci nêdo ferzkerdişî. La çi heyf ke no qerar hetê serokkomarî bi xo ya yeno binlingkerdişî.
Hem zî hetê serkkomarêke ke ey bi xo hîrê ray serre ro na Dadgeha Ewropa dayo. Helbet goreyê qewlanê ke îmzaye Tirkiye zî binê înan de esta no qerar dewlete zî eleqedar keno, zagonanê aye û daraza aye zî eleqedar keno.
Beno ke goreyê na desthilatîye ra sey qerarêke ne di ca de bêro qebûlkerdişî la ma eşkenê vacê ke na Dadgeha Ewropa ke qaşo Dadgeha Heqanê Merdiman a zehf rayan hetê binlingkerdişanê heqanê şarê Kurdî de bê veng zî menda û qerarê bê hiqûqî zî hetê heqanê merdimahî yê şarê Kurdî ke hetê na desthilatîye ra ameyê binlingkerdişî girotê.
Qerarê Roboskî nê qeraran ra yew o ke hetê na Dadgeha ra nêame qebûlkerdişî. Eke rastî bêro vatişî lazim bi ke na Dadgehe ne tenê semedê Demîrtaş î semedê heme parlamenterê Kurdan ke ameyê êsîrgirotişî û sereyê heme çî de zî semedê Rayberê şarê Kurdî ke bi serran o bi awayêke giran û bê hiqûqî yeno tecrîdkerdişî zî serbestî biwaştêne. Lazim bi ke na Dadgeh e vengê Wekîla Colemêrgî ya HDP’î Leyla Guvene ke aye bi xo zî bi awayêke bê hiqûqî hepisxane de yena girotişî ke semedê tecrîdkerdişê Rayberê şarê Kurdî ke hîrê serrî yo bi giranî hema vace heft serrî yo ke domêno heştê Mijdare de kewta grevê veyşanî bişinawo û gamêke nê hetî ser de zî berzo. Eke na Dadgehe xo sey Dadgehe Heqê Merdiman vînena wa binlingkerdişê heqanê şarê Kurdî ke hetê na desthilatîye ra hîrê serrî yo bi ca ameyê zî bivîno.
Lazim o ke na Dadgehe binligkerişê ke hetê heqanê cuwîyînî ser, hetê heqanê kultur û ziwanî ser, hetê heqanê siyasî û polîtîkî ser û hetê heqanê rayberdişê xocayî ser şarê Kurdî ser de ameyê pêkardişî zî bivîno û wezîfeyê xo bi ca bîyaro.
Heqê ti desthilatî û ti şexsêke çinê yo ke şarê Kurdî Heqanê înan ê bingehînan ra bêpar verdo. Di heme hiqûqanê dinya de zî û di heme qanûnanê dînan de zî heqê ti qewet û ti şexsî çinê yo ke şarêke heqanê înan ê merdimahî û esasîyan ra bêpar bido verdayîşî. Eyro bêziwan verdayîş û bêazadî verdayîşê şarê Kurdî pîya zî bêhiqûqî û gunakarî ya tewr pîl a.
