Tecrîdê serê Rayberê PKKyî Abdullah Ocalanî giran beno û 21 aşmî yo ke Rayberê PKKyî Abdullah Ocalanî, tepişteyê bînî Omer Hayrî Konar, Hamîlî Yildirim û Veysî Aktaşî yê ke Îmrali de binê tecrîdî de yenê tepiştene ra xeber nîna girewtiş. 3ê adara 2020î ra nata pêvînayîşo fîzîkî nêameyo kerdiş û 25ê adara 2021î pêvînayîşê bi telefonî yê kilm ra nata zî Ocalanî ra xeberêke nêameya girewtiş Avûkatê Abdullah Ocalanî Newroz Uysal û Rezan Sarica 8 serrî ra dima tewr peynî 2-22ê gulane, 12-18ê hezîrane û 7ê tebaxa 2019î de pêvînayîş pê ardbî. Înan ra dima pêvînayîş nêame kerdiş.
Wekîlê HDPyî ya Şirnexî Nuran Îmîre derheqê tecrîdê vera Rayberê Şarê Kurdî Adbullah Ocalanî de qisey kerd.
Îmîre vist vîrî ke înan seba pêvînayîşê bi Abdullah Ocalanî muracatê Wezîrîya Edaletî kerdo la cewab nêdîya înan ro û wina vat: “AKP mîyanê krîzan de yo û seba nimnayîşê ney zî Kurdîstan de û zîndanan de vera kurdan dişmenîye vila keno. Ewro pêro zîndanan de tecrîd yeno caardene.Tecrîdê vera Birêz Ocalanî aqilî ra dûrî yo. Ey ra 21 mengî yo qet yew xebere nêameye girewtene coka bi mîlyonan merdimî mîyanê qesawetî de yo.”
Îmrali de çi qewimîyeno?
Îmîre bale ante qedexeyê pêvînayîşan û rewşa Îmraliyî ser û vat: “Îmrali de çi qewimîyeno; keye, avûkatan û komelî ra çi nimîyeno? Her reye vera Birêz Ocalanî spekulasyonî yenê kerdene. Îqtîdar neçare yo ke muracatê avûkatan, keyeyî û ê ma qebul bikero û bi nê hawayî peynîya qesawetî bîyaro. Ma muracatê Wezîrîya Edaletî kerd ke şorê Îmraliyî la hema zî cewabêko pozîtîf yan zî negatîf nêdîya ma?”
Meseleya kurdan Birêz Ocalan eşkeno çareser bikero
Îmîre dîyar kerd ke seba ke meseleya kurdan çareser bikero Rayberê Şarê Kurdî neçare yo ke reyna bikero dewre û vat: “Ganî cade Birêz Ocalanî ra agahîyêke bêra girewtene. No waştişê pêro kurdan o, têna waştişê ma nîyo. Çarçewa huqûqî de ma muracatê her rayîr û metodî kenê. Îqtîdar bi xo krîz û kaosî weye keno û pê polîtîkayanê şerî estbîyayîşê xo paweno. Îqtîdar keno ke xo bêalternatîf bimojno. A raşte îqtîdar zî zaneno ke meseleya kurdan Birêz Ocalan eşkeno çareser bikero.” Çime: ANF
