Sînorê Almanya-Polonya de polîsanê gumrukî yê Almanan zereyê paketanê loqumê tirkî de 670 kîlo tîryak dî. Şoforo tirk ê kamyone ame tepiştene
Almanya de reya ewilêne hende eroîn yeno dîyene. Herêma Frankfûrt Oderî ya serê sînorê Almanya-Polonya de, yewîyanê polîsanê gumrukî yê Almanan kamyonêk bi plakaya Gurcistanî sehnaye û tede 670 kîlo eroîn dî ke yeno texmînkerdene vaya ci 50 mîlyon Euro ya.
Hêzanê polîsanê gumrukî pêhesna ke eroîn mîyanê paketanê loquman ê ke Tirkîya ra ameyê de ameyo nimnayene û resimanê rontgenî de bi şans ameyo dîyene. Yewîyanê asayîşî yê Almanan dima ra dest bi cigêrayîşî kerd û vet werte ke eroîn ê şebekeyêkê narkotîkî yê Tirk-Hollanda yo.
Eşkera bi ke eroîno ke kamyone de ameyo dîyene mîyanê 532 paketanê qijkekan ê loquman de ameyo nimitene. Şoforê kamyone ame tepiştene. Ameyêne plankerdene ke eroîno Afganistan ra ardibi berê Belçîka û ûca ra welatanê cîyayan ê Ewropa de biroşê. Yewîyanê polîsanê Almanan serra 2014 de eyaletê NRWyî de 330 kîlo eroîn dîbi. BERLÎN
