Navenda Nûçeyan |
Tevgera Jinên Kurd li Ewropayê (TJK-E) bi wesîleya 8’ê Adarê Roja Jinên Kedkar ên Cîhanê danezanek weşand.
Danezan bi sernavê ‘Li dijî qirkirina jinan, dem dema parastina jin a azad û civaka azad e’ hat weşandin.
Di daxuyaniyê de wiha hat gotin: “Di nava şaristaniya kapîtalîst a vê serdemê de ku qirkirineke mezin a çandî, civakî, siyasî û aborî li ser civakan û jinan tê ferzkirin, li dijî van polîtîkayên mêtingerî û zordariyê berxwedan û têkoşîneke mezin hatiye meşandin. Ev têkoşîn ji Rojhilata Navîn heta Ewropayê, ji Ewropayê heta Asyayê, ji Amerîkaya Latîn heta Afrîkayê li qadeke berfireh roj bi roj berfireh û mezin dibe.”
Têkoşîna jinên kurd her sal mezin dibe
Di daxuyaniyê de hat bibîrxistin ku jinên kurd di çarçoveya pêngava ‘Li dijî qirkirina jinan; dem dema parastina jin a azad û civaka azad e’ têkoşîna xwe xurt dikin û wiha hat domandin: “Dewlet hewl dide xeta azadîparêziya jinan û lêgerîneriya li sîstema konfederal a jinan a demokratîk terorîze bike. Têkoşîna jinên kurd a li dijî van êrîşan her sal mezin dibe. Têkoşîna azadiya jinan ne tenê cîhana jinan ji bo azadiyê diguherîne, her wiha sîstema baviksalar-serdest jî diguherîne. Ji bo tevahiya mirovahiyê, jiyaneke azad û demokratîk pêkan dike.
Bi navê Tevgera Jinên Kurd a li Ewropayê, em 8’ê Adarê ya sala 2021’ê bi dirûşma ‘Li dijî qirkirina jinan; dem dema parastina jin a azad û civaka azad e’ pêşwazî dikin. Kampanyaya ku me di 25’ê Mijdara 2020’î de dabû destpêkirin, bi biryardarî û coşeke mezin digihînin 8’ê Adarê. Bi rêya kampanyaya ‘100 SEDEM’ ên ji bo darizandina dîktator Erdogan, jinên kurd tevî dostên xwe li dijî faşîzmê û qirkirina jinan têkoşîneke girîng meşand.”
TJK-E’yê destnîşan kir ku bi vê kampanyayê, ji bo bidawîbûna polîtîkayên hovane û darizandina kiryarê van sûcan dîktator Erdogan, dê têkoşîna xwe mezintir bikin.
Di navbera 1-8’ê Adarê de dê li her derê bin
Di daxuyaniyê de hat ragihandin ku 8’ê Adara 2021’ê dê bibin dengê wan jinan ku ji ber xizmetên xwe yên tenduristî, perwerdeyê û li her qadên hilberînê nikarin berdêla keda xwe werbigirin û wiha hat domandin: “Em dixwazin keda jinan a ku bêqîmet dikin û nahêlin ew ked bê dîtin, raxînin pêş çavan. Di nava vê salê de jin li her sektorê nekarîn berdêla keda xwe werbigirin û hîn bêhtir xisirîn. Krîza ku ji ber şewba Covîd-19 rû da bêhtir xizaniya jinan zêde kir û kir ku hîn bêhtir tundî li jinan bê kirin. Ji ber vê yekê li dijî zexta zayendîperestiyê û rejîmên mêtinger, em jî li her qadê tev li grevên jinan dibin ên di asta navneteweyî banga wan hatiye kirin.
Li ser bingeha avakirina jiyana azad, honandina sîstema konfederal a jinan, ji b xurtkirina çalakiyên hevpar û avakirina tevna jinan em bi rojeveke girîng dest bi 8’ê Adara 2021’ê dikin. Di mijara rêxistinbûna xweser û xweparastinê de, bi rêya têkoşîna xwe ya li dijî qirkirina jinan, hem ji aliyê zîhnî hem jî avanî ve li ser bingeha wezîfeyên xwiştiyê, em qadeke girîng a têkoşînê ava dikin û pêl bi pêl mezin dikin. Li ser vê bingehê, em 8’ê Adara 2021’ê bi bawerî û daxwaza mezin a azadiyê pêşwazî dikin.
Bi navê TJK-E’yê di navbera 1-8’ê Adarê de em ê li dehan navendên Ewropayê çalakiyan li dar bixin, dakevin qadan. Her wiha bi rêya semîner û panelên onlîne, em ê bi sedan jinên ji welatên cuda li hev bicivînin. Tevî li Almanya, Fransa, Swîsre, Belçîka, Hollanda, Îngilistan, Awûstûrya, Yewnanistan, Swêd, Danîmarka, Norwêc û Fînlandiyayê, her wiha li Kanada û Awûstralyayê jî di 8’ê Adarê de jinên kurd dê li qadan bin, li dijî faşîzm û qirkirinê azadiyê biparêzin, berxwedanê mezin bikin.
Bi navê Tevgera Jinên Kurd a Ewropayê em dibêjin ku sedsala 21’ê dê bibe sedsala jinan, li dijî qirkirina jinan em Civaka Azad, Jin a Azad diparêzin! Em bang li jinan hemûyan dikin ku li dijî faşîzm, zayendîperestî, tecrîd, neteweperestî û paşverûtiyê, 8’ê Adarê bikin ew roj ku têkoşîn gihîştiye asta herî bilind.”
Di dawiya daxuyaniyê de bi vê têgihiştinê bang li jinan hemûyan hat kirin ku tev li çalakiyên 8’ê Adarê bibin.
