Platformê Vengê Tepîşteyan (TSP)yî dîyar kerd ke herêmanê erdlerzî ra, 17 hezar û 600 tepîşteyî û nêzdîyê 70 hezar zî merdimê tepîşteyan tesîrê erdlerzî de mendê. Gere dewlete bikera ke tepîşteyî û merdimê înan bieşkîyê yewbînan ra xebere bigîrê. Roja verêne ya erdlerzî ra yo ke hewl danê ke, hewcedarîyanê bingeyînan ê mexdûranê erdlerzî peyda bikerê.
Eşkerayîya Platformî de nê çîyî ameyî vatene: ‘‘Rîyê erdlerzan ra Vakurê Kurdîstanî, Tirkîya, Rojawanê Kurdîstanî û Sûrîye de bi des hezaran însanan dinyaya o bedilnaye û se hezaran însanî zî birîndar bîyê. Bi mîlyonan kesî zî bê war mendê. Seba ke dewlete erey mudaxeleyê xirban kerd xeylê însanî merdî. Hetkarîya ke hetê zerrîwazan ra ameyêne kerdene, a zî ameyêne astengkerdene.’’
Tepîşte û merdimê xo tesîrê erdlerzî de mendê
Komela CÎSSTyî, derheqê halê tepîşteyan de ke herêma erderzî de yê, eşkerayîyêka nuştekîye vila kerde.
Eşkerayîye de ame îfadekerdene ke herêmanê erdlerzî ra 17 hezar û 600 tepîşteyê tesîrê erdlerzî de mendê û wina ame vatene: “Goreyê zanayîşanê ma yê ke ma tepîşteyan, merdimê tepîşteyan û çapemenî ra girewtî, tayê tepîşteyî sewqê herêmanê bînan bîyî û tayê înan zî hema zî zîndananê herêman de yenê tepîştene.”
Eşkerayîye de ame waştene ke heqê telefone zî seba tepîşteyan bêro esasgirewtene. Û ame waştene ke halê tepîşteyan ê herêma erdlerzî rayapêroyî rê bêro eşkera kerdene.
