Di mudaxeleyeke polîsan de milê parlementera HDP’ê Feleknas Ûca şikiyabû û Ûca gilî kiribû. Lê belê Serdozgeriya Komarê ya Êlihê ji bo mudaxeleyê got ‘li gorî hiqûqê ye’ û biryara neşopandinê da
Di serdema grevên birçîbûnê de, di 19’ê Gulana 2019’an de HDP’ê xwestibû li Êlihê daxuyaniyekê bide. Lê belê bi hinceta ‘Walî qedexe kiriye’ destûr nehatibû dayîn û polîsan mudaxileyî girseyê kiribû. Di dema mudaxileya polîsan de milê çepê yê Ûca şikiyabû.
Parêzerên Ûcayê jî tevî dîmenên bûyerê û raporên nexweşxaneyê giliyê polîsan kirin. Serdozgeriya Komarê ya Êlihê jî lêpirsîn da destpêkirin û ji bo mudaxeleya polîsan re got ‘li gor hiqûqê ye’ û lêpirsîn bi neşopandinê bi dawî kir. Li ser vê parêzera Ûca Reyhan yalçindag li Dadgeha Ceza ya Sulhê ya 2’yan îtiraz kir lê belê dadgehê jî îtiraza wan red kir.
Li ser vê parêzer Yalçindag serî li Dadgeha Qanûna Bingehîn (AYM) da. Yalçindag anî ziman ku heger AYM jî tiştekî neyînî bêje, ew ê serî li Dadgeha Mafên Mirovan a Ewropayê (DMME) bidin. AMED
