Duh di dema avêtina ser avahiya HDP’a Amedê de, polîsan dest danî ser telefona parlementer Salîha Aydenîzê. Paşê polîsan telefona Aydenîz şikand û bi rêya esnafekî ji Aydenîz re şandin
Ji ber parlamenterên HDP û endamên partiyê li dijî tecrîdkirina Rêberê Gelê Kurd Abdullah Ocalan li avahiya HDP’a Amedê dest bi greva birçîbûnê kirin, duh bi şev polîsan avêt ser avahiyê. Di dema avêtina ser avahiyê de polîsan derî û paceyên avahiyê şikandin, parlemnterên HDP’î derb kirin û ji çalakgerên greva birçîbûnê 7 kes jî binçav kiribûn. Her wiha polîsan dest danî ser telefona parlementera HDP’ê ya Amedê Salîha Aydenîz jî.
Îro esnafekî telefona Aydenîzê anî avahiya HDP’a Amedê. Li gor agahiyên bi dest ketin, kesekî nenas telefon daye esnafekî û jê xwestiye ku bibe avahiya HDPê. Telefon bi awayekî perçekirî ji Aydenîzê re hat şandin. AMED
