Tecrîdê serê Rayberê Şarê Kurdî Abdullah Ocalanî ke vilayê pêro zîndanan bîyo û hem zerre hem zî teber de tecrîdkerdişê pêro şarî dewam keno. Prof. Georg Auernheimerî ard ziwan ke goreyê standartanê mîyanneteweyîyan tecrîdê vera Abdullah Ocalanî îşkence yo û ganî dewleta tirke abigêra masaya muzakere ser.
Auernheimerî vat: ”Sey gama yewine ganî Ocalan bêro veradayene.”Pedegag û Akademîsyenê verênî yê Fakulteya Zanistanê Merdiman a Zanîngehê Kolnî Prof. Georg Auernheimerî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.
Prof. Georg Auernheimerî tecrîdê Îmraliyî sey îşkenceyêkî pênase kerd. Auernheimerî vist vîrî ke rixmê pêro muracatan zî pêvînayîşê bi Rayberê Şarê Kurdî Abdullah Ocalanî yenê redkerdene û goreyê standartanê mîyanneteweyîyan tecrîdo winayên îşkence yo. Auernheimerî vat: ”No tecrîd nêno qebulkerdene. Seke ez zanena Abdullah Ocalan haştîye wazeno. Coka tepişîyayîşê ey ê heta nê wextî neheqî yo.”
Auernheimerî dîyar kerd ke ganî tecrîd bêro wedaritene û sey prosesê çareserîye yê 2013-2015î muzakereyî dest pêbikerê. Auernheimerî vat: ”Ganî dewleta tirke abigêra masaya muzekereyan ser. Seba ney veradîyayîşê Abdullah Ocalan do bibo gama verêne.”
