Rêveberiya Xweseriya Demokratîk a Bakur û Rojhilatê Sûriyeyê bi tevahî rêbazan hewl dide bandorên êrîşên dewleta tirk a dagirker ku di encamê de gelek navend û kargehên petrolê û xizmetguzariyê rawestîn, pêdiviyên welatiyan ên sotemeniyê peyda bike.
Li navçeya Holê ya Kantona Cizîrê Komîteya Sotemeniyê mazot li cotkarên ku zeviyên wan avî ne, belav dike.
Heta niha komîteyê sotemenî li 187 cotkarên ku ruxset ji saziyên çandiniyê girtine, belav kiriye.
Têkildarî mijarê endamê Komîteya Sotemeniyê ya navçeya Holê Yasir Xilêf da zanîn ku xebatên belavkirina parên din ên sotemeniyê wê li gorî derfetan bidomînin.
Di encama êrîşên dewleta tirk a dagirker li dijî herêmê de 20 navendên enerjiyê li herêmê rawestiyan wek 11 navendên petrolê, bîr û belavkirina petrolê, navendeke derxistina kehrebeyê, 7 stasyonên veguhastina kehrebeyê û kargeheke gazê.
Cotkarê bi navê Beşo El Beşo ku para xwe ya sotemeniyê wergirtiye diyar kir ku ji ber derengmayîna sotemeniyê hindek mabû zirar li hilberînan bibûba û destnîşan kir ku ji ber êrîşan û rawestîna jêderên sotemeniyê di encama wan de, mazot dereng li wan hatiye belavkirin
