Parlementerê HDPyî Musa Farisogullariyo ke kongreya Pasûrî de qisey kerd vat: ”Pasûrî de tay keyeyî vera HDPyî yenê dekerdene. Gore vatişê hukmatê AKP-MHPyî têmegêrê.”
Rêxistina Pasûrî ya HDPyî kongreya xo ya 2. kerde. Parlementerê HDPyî Musa Farisogullari, Remzîye Tosun, Hemserekê HDPyî yê Amedî Zeyyat Ceylanî zî tede îdarekar û endamê HDPyî tewrê kombîyayîşî bîyî.
Kongre deqayêkê rêzgirewtişî ra dima dest pêkerd û dima ra Musa Farisogullariyî qisey kerd û vat: “Şarê ma senî vera tedayan serranê 90an de xo ver da nika zî bi xoverdayîşêkê bêhempa çar parçeyanê Kurdîstanî de xo ver dano. ”
Farisogullariyî îfade kerd ke Pasûrî de tay keyeyî vera HDPyî bi yenê dekerdene û vat: “Sey vatişanê xiraban ê AKP-MHPyî têmegêrê. Vera nê kerdişan û vatişanê xiraban ganî ma sey şarê kurdan bibê yew. Pêro keyeyî û êşirî perçeyê şarê ma yê. Ma tîya ra veng danê ke vera dek û dolabê hukmatê faşîst ê îşxalkerî hişyar bibê. Ma sey Başûr, Rojawan, Rojhekat û Vakurî yewbînan ra cîya nîyê. Ma yew şar ê. Eke ma pîya tênêgêrê û têkoşînê xo pîl nêkerê hukmato faşîst ê AKP-MHPyî hîna zêde do hêrişê ma bikero.”
Hemserekê Rêxistina HDPyî ya Amedî Zeyyat Ceylanî zî kombîyayîşî de qisey kerd û vat: “Destê hukmatî de şerî ra ber çîyêk nêmend. Naye ra ma do xoverdayîşê xo pîl bikê û nînan tarîxî de vîndî bikê. Serkewtiş do ê şarê kurdî û hêzanê demokratîkan bo.” AMED
