Kobane,nameyê şaristanêke qic a Kurdistanî. Xoverdayîşê Kobane, sembola yewîtîya mîyanberê şarê Kurdî ya tarîxî û vengdayîşê şarê Kurdî ya her çar hetanê dinya de ya.
Serkewtişê Kobane, serkewtişê şarê Kurdî û heme şaran, bidestkewtişê azadî, demokrasî û têduştîya mînyanberê şaran û binkewtişê dagirkerî, zilm û hovîtîya DAÎŞ’î paştdayan û awankaranê înan a.
Wexta Kurdî tarîxe de raya yewine bî yewî û Kobane de hemverê çeteyanê tewr hovan ê dinya şerrê estbîyayîşî da, şerr û xovardayîşê înan bala heme şaranê dinya ante û înan zî waşt bi çalakîyanê xo bimojnê ra ke ey zî şarê Kurdî ver de yê.
Bi nê sebebî enternasyonalîst û demokratanê dinya ke mîyanê înan de merdimê zanyarî, ziwanzanî û kesê ke wayîrê xelatanê Nobelî zî bî da zanayîşî ke go heme welatanê dinya de semedê paştdayîşê Kobane roca 1’ê Mijdare sey Roca Kobane ya Dinya û paştdayîşê Kobane bêro qebûlkerdişî û bi nê awayî roca 1’ê Mijdare welatanê her çar hetanê dinya de meşî ameyî kerdişî, heta mîyanê înan de enternasyonalîstê ke bi xo mîyanê şerrê xoverdayîşî yê Kobana de ca girot zî bî.
Têkoşîna estbîyayîş, azadî û demokrasî ya şarê Kurdî bi yewîtî û xoverdayîşê xo yo ke Kobane de hemverê çeteyanê hovan moşt ra raya yewine heme dinya de ame naskerdişî û famkerdişî. Yewîtîya înan bi rayîrê nasdayîşê înan ê heme dinya de. Ma bawer kenê ke waştişê şehîd û cangorîyanê Kobane verdewamkerdişê na yewîtîya şarê Kurdî yo ke Kobane de amîbî qefelnayîşî. Kam heb partî yan zî şexsî eşkenê destkewtişanê neteweyî ke Kobane de bi yewîtî ameyî destkewtişî înkar bikerê? Heqê kam partî an şexsan esto ke pay bidê gune şehîdan û cangorîyanê Kobane ser? Ey ê ke nê heqî xo de vînenê heqê înan ê cuwîyayîşê na axa pîroz e ser de nêmaneno. Ey ê ke rayîrê yewîtî terk kenê û kişta dagirkeran de ca gênê lazim o na axe zî terk bikerê. Nan û awa ke na axa re yena înan rê heram a, sey jehrî ya. Helbet ma nê zî zanê ke her çiqas dagirker û xaînê ke înan dir hemkarê hewl danê ruhê ke bi xoverdayîş û serkewtişê Kobane şarê Kurdî bi dest visto têk berê zî şarê Kurdî roc bi roc zêdehîrê wayîr ro ey ruhî vecêno û Kobane heta bi heta bîya roşnê rayîrê Kurdan ê yewîtî û heme azadîwaşte, demokrat û merdimhezanê dinya.
Nê rocan de ke serra çarine ya têkoşîna Roca Kobane ya Dinya yena vîrardişî de kîn û hêrsê desthilatîya Tirkîye ke mexsedê aye û serekkomarê aye Kobanê de nêşibi sere rayêke bîne vecêno raşte . Na desthilatî dimayê çar serran hema zî nêwazena qebûl bikero ke şarê Kurdî hemverê çeteyanê înan ê hovan bi ser kewto û bi nê hewldayîşanê xo wazena şûne çeteyanê daîş’î degîro. Ma vînenê dimayo ke Erdoganî kombîyayîşê Stenboli de Merkel, Macron û Pûtîn ra destek girot bi tanq û topanê xo verê xo da Kobanê û wazena çimê şarê Kobanê û heme Rocawanî bitersno la, şarê Kurdî rayêke tehmê azadî û qiwetê yewîtî giroto û gefanê înan rê xo nêdano ro. Ruhê Kobane ke çar serrî verî deya ro go bêro verdewamkerdişî. Ne ey bi tanq û topanê xo, ne zî xaînî bi mixenet û paştadayîşê> xo yê dagirkeran nêeşkenê nê serkewtişê tarîxî veng vecê. Kobane bi yewîtîya Kurdan, bi gune cangorîyan bi ser kewta û go serkewte bimano.
