Roniştişê doza Hemşaredarê Bajarê Girdî yê Amedî Selçuk Mizrakliyî ke tepişte yeno muhakemekerdene dest pêkerd
Hemşaredarê Bajarê Girdî yê Amedî Selçuk Mizrakli 19ê tebaxe de wezîfe ra ameybî dûrîkerdene û qeyûm tayînê herinda ci ameybî kerdene. 22ê teşrîna verêne de çarçeweya îfadeyê Hîcran Berna Ayverdî ya îtîrafkare de ame tepiştene. Roniştişê ewilî yê doza Mizrakliyî ke tepişte yeno muhakemekerdene 9. Mehkemaya Cezaya Girane ya Amedî de dest pêkerd. Mizrakli bi îdîayê ‘Endamê rêxistine yo’ ameybî tepiştene û 7 serr û 6 aşmî ra heta 15 serran cezaya zîndanî ci rê yena waştene.
Verê roniştişê doze polîsan dormeyê Mehkemaya Amedî de tedbîranê girdî girewtî.
Hemsereka Pêroyî ya Partîya Herêmê Demokratîkî (DBP) Salîha Aydenîz, Hemserekê Kongreya Komela Demokratîke (KCD), Parlamenterê Partîya Demokratîke ya Şaran (HDP) Agirî Berdan Ozturk, Parlamenterê HDPyî yê Amedî, rayîrber û hemserekê HDPyî yê Amedî, rayîrberê CHPyî yê Amedî, Serekê Pêroyî yê KKPyî Sînan Çîftyurek, rayîrberê Partîya Kede, Serekê Baroya Mêrdînî avûkat Îsmaîl Elîk, rayîrberê Odeya Dortoran yê Amedî û xeylê temsîlkarê rêxistinan yê sivîlî tewrê roniştişê dozebîyî û doze taqîp kenî.
Mizrakli Zîndanê T2 yê Bunyan yê Kayserî ra bi rayîrê dîmen û vengî (SEGBÎS) tewrê roniştişî bî.
Roniştiş bi tespîtkerdişê nasname û pawitişê Mizrakliyî dest pêkerd.
Roniştiş dewam keno. AMED
