Ji bo Hevserokatiya DBP’ê Saliha Aydenîz û Keskîn Bayindir hatin hilbijartin
Di 5’emîn Kongreya Asayî ya Partiya Herêmên Demokratîk (DBP) de, hevserokên nû diyar bûn. Di kongreya li Salona Konferansê ya Navenda Bazirganî ya Cîhanê hat lidarxistin de, Salîha Aydenîz û Keskîn Bayindir ji bo hevserokatiyê hatin hilbijartin.
Hevserokên DBP’ê piştî hatin hilbijartina derketin ser dikê û beşdarvanên kongreyê silav kirin. Hevseroka DBP’ê Salîha Aydenîz, di axaftina kir de wiha got: “Em ê berxwedan û têkoşîna xwe dewam bikin. Îro li ser kurdan şerekê pir qirêj heye. Lê em ê ji bo gelê xwe, ji xeta xwe tawîz nedin. Em li Rojhilata Navîn û Kurdistanê ji pêvajoyek dîrokî re derbas dibin. Ji ber vê divê li her 4 parçeyên Kurdistanê em yekitiya xwe ava bikin. Gelê me vê yekê ji me dixwaze. Em ê bi ser bixin. Wê dawî jî bi heybet be.”
‘Tişta ji destê me bê em ê bikin’
Hevserok Keskîn Bayindir jî bal kişand ser êrîşên li dijî kurdan û ev tişt anî ziman: “Li ser kurdan zextên mezin hene. Em ê jî li gorî vê têkoşîna xwe dewam bikin. Em baş dizanîn ku barê me giran e. Ji îro û pêve em ê ala hevalên xwe bi bilindayî liba bidin. Hesreta yekitiya neteweyî ya gelê kurd heye. Em ê vê weke bawerê hildin ser milên xwe. Ji bo ku em yekitiya neteweyî pêş bixin, tişta ji destê me were em ê bikin.” ENQERE
