Çewlîg de her serre selahîyetdarî 3ê Kanûne Roja Astengdaran a Dinya de reyna mesajê ”Ma hetê şima de yê” danê. Selahîyetdarî tay komeleyanê astengdaran zîyaret kenê, pîya fotografan gênê û vanê qey bi nê hawayî wezîfeyê xo anê ca.
La şaristan de rayîrê xeripîyayeyî, rampayê berzî, vayê awe ûsn cuya astengdaran qat bi qat asteng kenê. Şaristan de seba hemwelatîyanê astengdaran tuwaletî çin ê, cuya sosyale çin a. Nê meseleyî vera zêdîyenî zî. Şaredarîye û dezgehê dewlete yê eleqedarî têna karanê batalan kenê. Rayîr û pirdan tîtiknenê la xizmeto raşto ke hewceyê şarî ci rê esto, nêkenê. Şaristan de hemwelatîyê astengdarî selahîyetdaranê dewlete ra wazenê ke herinda ke mesajan danê wa nê astengîyan wedarê. ÇEWLÎG
