Şaredarîya Sûrî weçînayîşê 31ê Adare ra dima kontratê 146 kesanê ke qeyûmî bi hawayêkê bêusulî girewtê kar, betal kerdî
Qeyûmê qezaya Sûrî ya Amedî, rixmê serkewtişê weçînayîşê 31ê Adare yê Partîya Demokratîke ya Şaran (HDP), 5 Nîsane de 146 kesî girewtî kar. Şaredarîya Sûrî kontratê 146 kesanê ke qeyûmî bi hawayêkê bêusulî girewtê kar betal kerdî.
Hemşaredarê Partîya Demokratîke ya Şaran (HDP) yê Surî Fîlîz Buluttekîne û Cemal Ozdemîrî, badê ke mazbataya xo girewtî, seba cigêrayîşê girewtişê xebatkaranê şaredarîye yê wextê qeyûmî komîsyonêk pêard. Netîceyê cigêrayîşanê komîsyonî de girewtişê xebatkaran de bêusûlîye ameye tespîtkerdene û nê ameyî raporkerdene. Nê bêusûlîyî sey madeyan ameyî rêzkerdene û 146 kesê ke bêsuslîyê ameyê girewtene kontratê ci ameyî betalkerdene. AMED
