Vera talankerdişo ke bi aşman o dewam keno de Kongreya Komela Demokratîke (KCD), Tevgerê Cinîyanê Azadan (TJA), Partîya Demokratîke ya Şaran (HDP), Partîya Herêmê Demokratîkî (DBP) û Tevgerê Ekolojî yê Mezopotamyaye do 17ê êlule de bi siloganê ‘Ma Vera Rijnayîşê Şer û Talankerdişê Xozayî Rayîr Şinê’ ver bi Koyê Cûdîyî ra rayîrşîyayîşêk virazenê. Rêxistinê partîyê sîyasî û rêxistinê komelkî yê Wanî seba tewrbîyayîşê Rayraşîyayîşê Cûdîyî eşkerayîya çapemenî dayî. Eşkerayîye awanîya HDPyî ya Wanî de ame viraştiş û xeylê kesî tewrê ci bîyî. Verfekê Komîsyonê Ekolojîyî ke seba rayraşîyayîşê Wanî ame viraştiş Mesut Borî eşkerayî wend.
Eşkerayîye de wina ameye vatiş: “Ma vera talankerdişê xoza, daristan, tarîx û kulturî rayraşîyayîşê Koyê Cûdîyî virazenê û vera talankerdişî sere wedarnenê. Cuya herêma Botanî binê tehlukeyî de ya û ma wazenê peynîya no talanî bêro. Ma wazenê wa herkes vera qirkerdişê daran û talankerdişê xozayî 17ê êlule de tewrê rayraşîyayîşî yê Cizîrî ra ver bi Cûdîyî bibo.”
Komele û dezgehê ke metne eşkerayîye îmze kerdî wina yî: “Partîya Demokratîke ya Şaran (HDP), Partîya Herêmê Demokratîkî (DBP), Tevgerê Cinîyanê Azadan (TJA), Komeleya Kultur, Yewîye, Paştîdayîş û Hetkarîya Keyeyanê ke Merdimê xo Domananê Şaristanîyê Vînîbîyaye de Vînî Kerdî (MEBYA-DER), Komeleya Paştîdayîşê bi Keyeyanê Tepişteyan û Hukmweran (TUHAYDER), Komeleya Huqûqnasê Seba Azadîye (OHD), Yewîya Odeya Awanîsaz û Endezyaranê Tirkî (TMMOB), Konfederasyonê Sendîkaya Kedkaranê Rayapêroyî (KESK), ÇEVDER, BASKDER, SERHAT GOÇDER, ARYEN Huner, Tîyatroyê Mencel, ARSÎSA, Meclîsê Mayanê Aştîye û Odeya Lokantavan û Şofêran.” WAN
