Wexta merdim anêno peyman û hiqûqanê dewletanê Ewropa ra ke bi mexsedê Heqanê Bingehînan ê Merdimahî yê gerdûnî ameyê viraştişî û qebûlkerdişî merdim vano qey bi raştî nê peyman û hiqûqî semedê heme merdimahî yenê bi ca ardişî la, raştî qet sey ke eyseno nîya.
Tenê merdim banîro binlingkerdişê heqanê merdimahî ke hetê dewlete Tirkîye ra nê serranê peyînan de şarê Kurdî ser de pêk ardê ra û hemverê nê kerdişanê înan bêvengîya dewletanê ke wayîrê peymananê heqanê merdiman ê (!) ra zî merdim baş fam keno ke samîmîyetê înan ê nê peymanê newînan ra çi derece de yo. Hemvero ke verepersîya dewleta Tirkîye zî di nê peymanan de esta zî heta nika ti hesabêke aye ra nêameyo perskerdişî heta hetê zehfê dewletan ra paştî aye rê amîya dayîşî.
Nê serrê peyînan de bi desan şaristan û qezayê Kurdan hetê na dewleta ke îmzaye aye zî binê ay peymananê (qaşo) heqanê merdimahî de esta ra ameyî xerakerdişî, bi seyan tûtî, cinî û extîyarî ameyî kiştişî, bi hezaran merdimî ameyî koçkerdişî, cinî û tûtan ra bigî heta siyasetmedar, polîtîkakar û rayveberê xocayî yê Kurdan ke îradeyê şarê Kurdî yê ameyî hepiskerdişî, heta raybazêke hovane (sey xerakerdişê goran) ke heta nika hetê ti dîktatoran ra nêameyo kerdişî zî hetê na pergale ra şarê Kurdî ser de pêk ame û ancî heme dewletî bê veng mendî.
Ma bî şahid ke dewletanê Ewropa û dewletê bînî ke vanê ma wayîrê demokrasî û heqanê merdimahî yê gerdûnî yê bi kaykerdişê xo yê hîrê meymûnan hetkarî da kerdişanê na pergala faşîst e.
Yanê merdim eşkeno vaco ke peymanê ke semedê heqanê merdimahî viraştê qet semedê merdimê ke binê desthilatîyanê netewdewletan de tûşê neheqî, tehda û zilmî yenê nêfînenê dewre û heta zehfê rayan hetkarîya pergalê newînan kenê.
Yanê bi vatişêke bîn; nê peymanê înan peymanê heqê merdiman nîyê peymanê hetkarîya netewdewletan ê. Ma vînenê, hemvero ke îmzaye dewlete Tirkîye binê zehf peymananê heq û hiqûqê merdiman a gerdûnî de esta zî bi awayêke xo ra bawer ke go ti dewletêke aye ra binlingkerişanê aye ke heqanê merdimahî yê şarê Kurdî ser de û bêhiqûqî û tehdayanê ke înan ser de pêk ana nêwazo.
Xo ra yeno zanayîşî di komploya ke Rayberê şarê Kurdî ser de pêk amî de zî destê zehfê netewdewletanê dinya esto û eyro zî destekê înan tecrîd, bêhiqûqî û hovîya ke ey ser de pêk yena de esto.
Ancî dagirkerdişê aye yê Efrînî û hewldayîşê aye yê Rojawanî zî bi destekê eynî dewletan domêno. Helbet sere de cinîyê Kurdan heme şarê Kurdî risayê na hişmendî ke bi vatiş û peymananê netewdewletan nêxapêyê û bi têkoşîn û yewîtîya xo biarsê heqanê xo yê bingehînan ê merdimahî û azadîya xo. Nê têkoşînan ra yew zî hetê siyasetmedara Kurd e Leyla GUVENe ra ke semedê wedartişê tecrîdê Rayberê şarê Kurdî ser de aşmêke yo bi grevê veyşanî dayo destpêkerdişî yo.
Giroteyanê azadî, siyasetmedaran û şarê Kurdî yê bînan zî verepers da nê waştişê têkoşera rêzdar e û dest bi grevê veyşanî kerd. Her çiqas netewdewletî goreyê nehfanê xo ra û elehîya ma de tê bigeyrê zî ma zanê ke serkewtişê ma zî, azadîya ma zî di yewîtîya ma de ya.
