Fraksîyonê Goran yê Parlamentoya Herêma Kurdistanî waşt ke Tirkîye peynîya bombdûmananê serê herra Başûrê Kurdistanê bîyara û hêzê xo Başûrê Kurdistanî ra veja.
Şarê Şêladizî vizêr seba şermizarkerdişê hêrişanê dewleta tirkî yê baregehê tirkan ke 23ê Çeleyî de herême bombardûman kerdbî û netîceyê hêrişan de 4 sivîlan qetil kerdbî, eştî serê qereqolê leşkeran yê tirkî. Leşkeranê tirkan adir varna serê şar û netîceyê hêrişanê artêşa tirkî de 2 kesî şehîd bîyî. Şarê Behdînan ke şîyî serê qereqolî wesayîtanê leşkerî û çadirê leşkeran veşênayî. Badê serewedarnayîşê şarî yê Qereqolê Sîrê, Wezîrê Karê Teber yê Tirkîye Mevlud Çavuşoglu, Serekê Herêma Kurdistanî Neçîrvan Berzanî reyde pêvînayîş viraşt. Neçîrvan Barzanî zî dîyar kerd ke do tehqîqat dest pêbikerî. Heto bîn ra fraksîyonê Tevgerê Goran yê Parlamentoya Herêma Kurdistanî derheqê babete de îzehetêko nuştekî da.
Îzehet de veng dîya Tirkîye ke peynîya hêrişanê serê herra Başûrê Kurdistanê bîyara û hêzê xo Başûr ra veja. Tevgerê Goran îzehet de wina va: “Wezîfeyê hukmatê Iraqî oyo ke Herêma Kurdistanî û sînorê Başûrê Kurdistanî bipawa. Problemê kurd yê Tirkîye bi bombardûman, kiştiş û hêrişan çareser nêbeno. Hêriş tena hûmara qurbanîyan zêde keno.”
