Sere de Amed, Sêrt, Mêrdîn, Çewlîg, Meletî, Xarpêt, Dêrsim û Wan de şaristananê Kurdistanî de vizêr şan varayîşê vewre dest pêkerd û hema zî tesîrê xo mojnenê ra. Varayîşê vewre ra rayîrê dewan û taxan qefilîyayî. Zaf cayan de hemwelatîyî ameyî hîşyarkerdene ke vera cemidîyayîş, vewrês û resayîşî baldar bibê.
Bêtebdîrîya Qeyûmî!
Merkezê Amed de zî tesîrê varayîşî vewre bi heman hawayî xo mojneno ra. Varayîşê vewre ra trafîkê meydanan û cehdeyan de zixletîye ameye meydan. Zaf noqtayanê cîyayan ê şaristanî de qezayê qijî yê trafîkî qewimîyayî.
Qeyûmê Amedî vewra cehdeyan û bulvaran nêdaye pakkerdene û seba cemidîyayîşê rayîran tebdîrî nêgirewtî. Hemwelatîyanê Amedî vera tewirê qeyûmî nêrazîbîyayîşê xo mojna.
Herêma erdlerzî
Varayîşê vewre herêma erdlerzî Meletî û Xarpêt de mexdurê erdlerzî yê ke xeyman de manenê ser o bi hawayêkê xirabî tesîr kerd. Ame parekerdene ke varayîşê vewre nê di şaristan de zî heta saetanê şewe dewam bikero.
Wan de zî vewre pêro rayîrî girewtî û qalinîya vewre resaye 45 santîman. Mêrdîn, Şirnex û Riha de zî serran ra dima reya verêne vewre varaye.
Êlih, Amed, Sêrt, Çewlîg, Mêrdîn, Şirnex, Wan û Dêrsim de zî dibistanan ewro mabênê perwerdeyî da. Nê şaristanan de karmendanê diganan û astengdaran rê zî destûrê karî ama dayene.
