Ma weçînayîşê 31ê Edare 2019î xo ra pey vîyarda. La no weçînayaşê ser o hima zaf munaqeşey benê. No weçînayîş, weçînayîşêko demokratîk nêbi. Serekkomar Erdoganî, semedo ke sîyaseten destekê nîjadperestan bigêro; hem teberê Tirkîya de, hem zî zerreyê Tirkîya de, polîtîkaya şîddetî esas girewtbî. Yewna het ra HDP û weçînayoxê HDP terorîstey ra sucdar kerdnê. Bi nê vatişê xo, waştnê ke rayanê HDP kemî biko. Yewna het ra zî semedo ke rayanê CHP û ÎYÎ Partî kemî biko, HDP ser ra tewir bi tewir heqeret nê partîyan zî kerdnî. Kamî ke ray nêdanê ey, se terorîst îlan kerdnî. La yewna het ra vatnî ke; “ Birayê mi kurdî, terorîst nîyê.” Semedo ke rayanê kurdan bigêro, edebîyatê birayey kerdnî. Gelo ina/wina yew birayey/birayîye bena? Yew het ra kurdî ke rayanê xo danê HDP se terorîst îlan kenê, yewna het ra eynê kurdan ra rayan wazenê. 1991 de wekîlê kurdan yê ke meclis te kurdkî qalî kerdbi, bi desan serrî ceza dabi bide/bere. Hima zî wexto ke wekîlê kurdan, Meclis de, bi kurdkî qalî kenê, zabitanê Meclîsî de, kurdkîyî; se “ziwanêko nîyno famkerdiş” name kenê. Şima hima zî resmîyet de, ziwanê kurdan qebul nîkerdo, na çi tewir yew birayey a?
Raşta ey Serekkomar Erdogan, zaf agresif têgeyreno. Tifaqa AKP-MHP dest de, tena polîtîkaya nîjatperestey û şîddetî menda. Serekkomar Erdogan, semedo ke vengê mûxalîfan û bi tayabetî vengê HDP bibirîyo çi destê ey ra emeyo kerdo. Welatê kurdan de, semedo ke AKP serbikewo; leşkerî, polîsî, qaymeqamî, qorûcûyî/cerdevanî, seferber bîybê. Bi konvoyan şîynê sindoqan ser. Tayê şaristanan û qezayan de hûmara leşkeran û polÎsan weçînayoxanê cayîyan ra vêşêr bî.
Welatê kurdan de, Amed, Wan, Mêrdîn, Êlih, Sêrt, Colemerg, Îdir û Qers de HDP ameyê girewtiş. Girewtişê Qersî û Îdirî zî muhîm bi. Ma zanê ke Îdir de, vera HDP; AKP, MHP Û ÎYÎ Partî bîyê yew. Raya ewilî ya ke Qers yeno girewtiş. Agirî, Şirnex û Bedlîs, tayê qezayî, dekewtê destê AKP. Dêrsîme zî dewkete deste tifaqa çepan. Mûş de zî semedo ke newe ra weçînayîş bibo, HDP îtîraz kerdo. Tifaqa AKP-MHP; Şirnex bi tehdîtan, bi 9 hezar leşkeran û polîsan Şirnex dekewto destê AKP. Aseno ke dewlete Şirnex de, yew mudaxele kerdo. Tehda û neheqeya dewlete bibo zî ganî HDP bi teferûat nê cayan ser o vindro.
Yewna çîyo muhîm o yo ke, Rojawan de tifaqa AKP-MHPyî, Enqera, Stanbul, Edna, Mersîn, Antalya de vînî kerdo. Vînîkerdişê nê şaristanan de HDP rolê xo kay kerdo. Tirkîye de kam/kame ke heqeret kurdan û îradeyê kurdan biko, cewabê xo gêno. Tifaqa AKP-MHP heqeret kurdan û îradeyê kurdan kerd, na tifaqe zî Rojawan de yew cewabo weş girewto. Rojawan de şaristananê pîlan de tifaqa AKP-MHP verra şona vînî kena. AKP zafê ey merdimanê apolîtîkan û nêwendeyan ra rayan gêna. La tekera tarîxî tepa nêageyrena. AKP û ortaxê ya, mutlaqa vînî kenê.
Serekkomar Recep Tayyîp Erdogan û partîya AKP, sîyaset de zî dînê îslamî seba menfeetê xo yê sîyasîy şuxulnenê. Dînê Îslamî, ganî destê dewlete ra bigêrÎyo û teslêmê cematî bibo. Dînê Îslamî, wa hinê esla sîyaset û rantê ekonomî rê nêbo alet. Hinê bi Dînê Îslamî, ancax nizanan û nêwendeyan xapînenê. Merdimî ke Dînê Îslamî tam zanê, hinê nêxapînê.
Tirkîye de ‘Meseleya Beka’ çin a. Asil derdê înan, bekaya îqtîdar û menfeetê înan o. Her weçînayîş ra ver, behsê “Bekaya Tirkîya” kenê. Eleqeyê weçînayîşê îdareyê yê mahalîyan û beka çin o. Tifaqa AKP-MHP bekaya îqtîdarê xo wazenê. Raşta ey bi propagandaya ‘beka’, MHP rayê xo vêşî kerdê û epey şaredarîyî qezenc kerdê.
Yewna het ra semedo ke sîyaseten HDP zeîf bibo; Hemserekê HDP Selahattîn Demîrtaş û Fîgen Yuksekdag tede, 12 wekîlî dekerdbê zîndanan. 8 wekîlî zî Meclîs ra vistbê. Yewna het ra 102 şaredarîyanê BDP ra 94 şaredarîyan rê qayûmî tayîn kerdbê. Hima-hima heme hemserekê şarederîyan dekerdbê zîndanan. Bi des hezaran îdareker û aktîvîstê HDP û BDP dekerdbê zîndanan. Raşta ey eke Tirkîye de demokrasi bibîynî û nê wekîl, îdareker û aktîvîstê HDP zerre de nêbîynê netîceya nê weçînayîşî ina/wina nêbîynî. La rayna zî HDP, no weçînayîş de vera partîyanê sîstemî role xo kay kerd û qayûman ra şaredarîyî girewtê.
AKP tehamulê vînîkerdişê îqtîdarî xo nekena. Stanbul tede zaf cayan de îtîraz kerdo. Semedo ke Serekê Heyetê Weçînayîşê Berzî vet ke; “Stanbul de Ekrem Îmamoglûyî qezenc kerdo.” Nika zî Serekê Heyetê Weçînayîşê Berzî, se hedef nawnenê.
Tirkîye de sîstemê yew merdimî pratîze beno. Tirkîye de heq, huqûq û demokrasî nêmendo. Nika zî vanê ke ma rayna qayûman tayîn kenê. Kurdî, nêwazenê ke ne qayûmÎ îradeyê şarê xesp bikê/bikerê. Xora şarê ma bi rayanê xo eşkera kerd ke, hinê nêwazeno ke, qayûmî şaristananê ma îdare bikê/bikerê.
Hinê lazim o ke AKP-MHP îradeyê şarê ma hezm bikê/bikerê. Ma wazenê ke heme kes, îradeyê şarê ma rê zêz bibo. AKP û MHP zaf behsê demokrasî kenê. Xora vejîya orte ke, çîyêda înan û demokrasî pîya çin a. Eke rayna qayûman tayîn bikê; ne zerreyê Tirkîya de ne zî teberê Tirkîya de, bawerîya yewerî bi înan nemanena.
