Bi armancê pawtişê ziwanê Kurdî 10’ê Mijdara 2018’ine de raya yewine amyayîşê tê hetî yê sazîyanê civakî û new partîyê Kurdanê Bakurî hêvîyêke pîl e mîyanê şarî de da viraştişî.
Helbet ma zanê xebata ke hemverê qedexe, zordestî û asîmîlasyono ke se serre yo ziwanî Kurdî ser de ameyo rûnayîşî û otoasîmîlasyono ke şarî ser de tesîrê xo roc bi rocî zêdehîrê mojneno ra bêro kerdişî zehmetîyê xo zehf zêde yê la, ma nê zî zanê ke zehmetîyê ke bi yewîtî nêrê wedartişî çinî yê.
Eke şarêke biwazo, bi yewîtîya ke pêk bîyaro çîyo ke bi sere nêbero çinê yo. Loma şikê ma çinîyo ke go na saete ra tepya rewşê ziwanê Kurdî verî ra başîrê bo. Etya çîyo ke lazim o ma nê qerarê tarîxî ra vecê no yo ke lazmatîya ma sey ziwanî heme hetî ya bi yewîtî esta.
Lazmatîya yewîtîya şarê Kurdî rocê ma yê eyroyî de her wextî zêdehî rê zêdya ya. Bi seyan serran o hem hetê herçar welatê dagirkeran ra ke welatê ma dagir kerdo, hem zî hetê welatanê emperyalîst û kapîtalîstan ra ke her wext madî û manewî paştî daya nê herçar dagirkeran şarê ma rast ro zilm û zordestî ameyo û erdnîgarîya ma amîya talankerdişî.
Çi heyf ke hemverê heme zilm, zordestî û talano ke ameyo kerdişî zî vengê ma yan nêvecyayo yan zî kêmî û perçe perçe vecyayo.
Senîn ke înan sînorî mîyanberê erdnîgarîya welatê ma de dayî ro ma zî dest pê kerd mîyanberê şarê xo, ciwiyînê xo û xo bi xo de sînor û qedexeyî qat bi qat dayî ro. Xo ra wexta ma ey sînorê dagirkeran qebûl kerdî û bi rûnayîşê sînoran ê mîyanberê xo de vernî ro heme awayî hêrişanê dagirker, emperyalîst û kapîtalîstan zî xo ser de zêdna. Tarîxe çarperçekerdişê welatê ma ra heta rocê ma yê eyroyî bi desan qirkerdişî şarê ma ser de ameyî pêkardişî, ziwanê ma ame qedexekerdişî, erdnîgarîya ma amî talankerdişî la semedo ke perçekerdişê pîlî ma mîyanberê xo de viraştî û yewîtî ra dûrî kewtî ziraro pîl ma xo bi xo da şarê xo û erdnîgarî û welatê xo ro. Her ke ma têra bî dagirkeran zêdetir efterayîşê qirkerdişan girot.
Her ke ma jobînan ra dûrî kewtî emperyalîst û kapîtalîstan bêbextî û kayê xo ma ser de zêdnayî.
Eyro roc qeraro lîşin(leymin) û bêexlaq ke Emerîka semedê girotişê hîrê pêşenganê siyasî yê Kurdan giroto nîşaneyê çinêbîyayîşê yewîtîya ma yo. Eke ma yewîtîya xo virazê û hemverê qeraranê newînan ê dagirker û emperyalîstê faşîstan vengê xo vecê ey ko qerarê newînan wina rehet nêgîrê. Eyro roc ma vînenê ke Emerîka rayêke bîne menfîetê xo dayo vernîya exlaq û merdimahîya xo û wazena semedê menfîetê xo heqaret ro şarê Kurdî bikero.
Lazim o şarê Kurdî hemverê nê qerarê aye bê veng nêmano her çar perçeyan de bertekanê xo bimojno ra û wina bikero ke ne Emerîka ne, dagirkerî ne zî emperyalîstê bînî nêefterê ke çiyîke newîn bifikirîyê û qerarê newînan bigîrê.
Lazim o şarê ma bi yewîtîya xo hemverê nê qerarê Emerîkaya di rî vecîyo û aye mecbûr verdo ke pey ra game berzo. Her bêvengîyêke ma hêrîşêke dagirker û emperyalîstan o ro mafanê ma yê merdimahî û ro axa ma. Her vengêke ma û yewîtîye ma zî bêtesîrkerdişê hêrîşanê înan o. Lazim ma nê baş bizanê ke yewîtîya ma temînatê estbîyayîşê ma ya.
