Hemsereka Pêroyî ya HDPyî ya verêne Fîgen Yuksekdage derheqê qerarê tepiştîşî yo ke seba aye reyna ameyo girewtene de vat ez biheyecan a, cuya xo de raya verêna ke ez heman dewa ra di ray ameya tepiştene. Nê welatî de çîyê verênî tim qismetê ma benê
Hemsereka Pêroyî ya Partîya Demokratîke ya Şaran (HDP) ya verêne Fîgen Yuksekdage hesabê xo yê Twîtterî ser ra derheqê qerarê tepiştîşî yo ke vera aye û Hemserekê Pêroyî yê HDPyî yo verên Selahattîn Dermîrtaşî de ameyo girewtene de eşkerayîyêk daye.
Yuksekdage mesajê xo de nê vatî: “Ez biheyecan a, cuya xo de raya verêna ke ez heman dewa ra di ray ameya tepiştene:) Nê welatî de çîyê verênî tim qismetê ma benê. Na bêhuqûqîye mizeho sîya yo la bi naye huyayîşê çewî zî nêno. Semedê vernîgirewtişê tehlîyeya Selahattîn Demîrtaşî verê çimanê heme dinya de bêhuqûqîye kenê. Xora îhtîmalê tehlîyeya mi rê zî tehemul nêkenê. Senî ke derheqê ma de lez û bez qerarê tepiştişêkê neweyî ame dayene wazenê dewaya esasîye ya ke ez yena muhakemekerdene de cade qerar bîgê. Ma se vajê, semedê ma xeylî fermanî ameyî nuştene û dirnayene. Ez bawer kena cinî, heme şarê Tirkîya vera fermanê Qesrî yo ke seba qetilkerdişê azadîye, demokrasî û huqûqî yo, cewabêko polîtîk û ehleqî dano. Ez tîya ra silamanê bicoş û heskerdişê heme cinîyan ê sîyasetmedaran şawena. Ma çok nêda, verê zulmî de milê xo çewt nêkerd; her tim ma wina ser kewtî. Wa çew bêumîd mebo. Ê do vînî bikerê. Vera zulmî yê ke anorê merdimîye û azadîye pawenê do ser bikewê.” Çime: ANF
